خطورة الترامادول وطريقة العلاج: 

تقرير عن الترامادول 

كل ما تريد أن تعرفه عن الترامادول ؟؟؟ وعلاج الادمان عن الترمادول 

الترامادول في الأساس مسكن للآلام المتوسطه و الشديده و هو من عائلة المورفينات

ما الفرق بينه وبين أي مسكن تاني زي التروفين والبانادول مثلاً ؟؟؟

الفرق إن الترامادول بيشتغل علي الجهاز العصبي المركزي فبيعمل تسكين للآلام و بيعمل حاجه تانيه خطيره جداً اللي بنسميها بالعاميه "بيعمل دماغ" و جملة بيعمل دماغ هى اللي بتخلي متعاطي الترامادول يدمنه بعد فتره

ما هو مدخل الترامادول للشباب والمتزوجين ؟؟

1- لو لقيت نفسك بتاخد ترامادول أيام الإمتحانات عشان يديك باور و تقدر تطبق باليومين و التلاته ... أنت كده هتدمن ترامادول.
2- لو لقيت نفسك بتاخد ترامادول عشان تلعب ماتش كوره كويس ... أنت كده هتدمن ترامادول. 
3- لو لقيت نفسك بتاخد ترامادول عشان شغلك متعب و مرهق جداً و الترامادول بيساعدك علي أداء شغلك بسهوله ... إعرف إنك هتدمن ترامادول.
4- لو لقيت نفسك بتاخد ترامادول عشان فاكر انه بيزود القدره الزوجيه ... أنت كده علي المستوي البعيد بتعرض نفسك لمشاكل زوجيه غير انك برده هتدمن ترامادول.

كيف تعرف أنك بقيت مدمن ترامادول ؟؟؟؟؟

1- لما تلاقي الجرعه اللي بتاخدها ما بقتش تكفيك و مضطر تزود في الجرعه عشان تاخد نفس التأثير يبقي انت كده بقيت مدمن ترامادول.
2- لما تلاقي نفسك لما بتبطل ترامادول بيجيلك آلام لا تُحتمل في كل جسمك و بالذات مفاصلك و أسفل ضهرك يبقي انت كده بقيت مدمن ترامادول.
3- لما تلاقي نفسك عندك رغبه قهريه إنك لازم تنزل تشتري الترامادول و بتضطر تعمل أي حاجه لدرجة إنك تسرق أو تسيب أهلك جعانين عشان تروح تجيب ترامادول يبقي انت كده بقيت مدمن ترامادول.
4- لما تلاقي نفسك من أول ما تصحي لحد ما تنام كل تفكيرك في حاجه واحده بس هي ازي تجيب ترامادول و سايب اي حاجه تانيه في حياتك يبقي انت بقيت مدمن ترامادول.

ما آثار الترامادول علي الجسم ؟؟

"و المقصود هنا اللي بيستخدموا الترامادول لفترات طويله":
1- الدوخه المتواصله و ضعف التركيز و عدم القدره علي تقدير المسافات.
2- الشعور بالإرهاق و الخمول و الضعف العام. 
3- اضطرابات النوم و الأرق الشديد. 
4- العصبية الزائدة والسلوك العنيف. 
5- وجود رعشة لا إراديه في بعض أجزاء الجسم تصل لحد التشنجات العنيفه.
6- الغثيان و القيء و عسر الهضم. 
7- فقدان الشهيه و نقص الوزن.
8- جفاف الفم والشعور بالعطش.
9- فقدان الوعي. 
10- عدم القدره على التنفس.
11- الهلاوس السمعيه و البصريه. 12- تسارع ضربات القلب. 
13- خلل في وظائف الكبد و الكلي.

 ما هي أعراض إنسحاب الترامادول ؟؟؟

"و المقصود بيها الأعراض اللي بتحصل لمريض ادمان الترامادول لو قرر يبطله فجأه":
1- قيء و إسهال. 
2- آلام شديده بكل الجسم و خصوصاً المفاصل و أسفل الظهر.
3- صداع شديد.
4- رشح الأنف.
5- إحساس بالبروده حتي في الصيف.
6- حركات لا إراديه و نفضات تصل لحد التشنجات العنيفه.
7- الهلاوس السمعيه و البصريه.
8- الأرق الشديد و عدم القدره علي النوم لفترات طويله جداً.

أخيراً ما هو علاج إدمان الترامادول ؟؟

بيتم عن طريق مرحلتين:

المرحلة الأولي: 

مرحلة إزالة الترامادول من الجسم "الديتوكس" "من 5 أيام إلي أسبوع"

في المرحله دي المريض بيقدر يتخلص من الإدمان الجسدي للترامادول 
في المرحله دي المريض المفروض يتحجز و يبقي تحت إشراف طبي كامل و هاده بسبب أعراض الإنسحاب العنيفه اللي قلناها قبل كدة

في المرحله دي بنوقف الترامادول تماما و بنتحكم في أعراض الإنسحاب من غير ألم خالص كل حاجه و بيبقي الجسم في الفتره دى اتخلص من الإدمان الجسدي للترامادول بمعني ان الجسم خلاص مابقاش محتاج الترامادول عشان يسكن الآلام .

#المرحلة الثانيه: 

إعادة التأهيل "من 6 شهور الي سنه"

وهى مرحلة التخلص من الإدمان النفسي للترامادول بمعني إن مريض الترامادول متعرض في أي وقت انه يحصله "انتكاسه" يعني يرجع لإدمان الترامادول مره تانيه و هنا بييجي دور الطبيب النفسي اللي بيشتغل مع المريض برنامج اسمه "العلاج المعرفي السلوكي" عن طريق البرنامج ده المريض بيقدر يتخلص من الإدمان النفسي للترامادول و بيقدر يتعامل مع المجتمع بطريقه سليمه و بتتغير مفاهيم المريض

وبيقدر يواجه الحياه بطريقه جديده و أفكار جديده 
المرحله دى مش شرط ان المريض يتحجز فيها ممكن يعمل متابعات عن طريق جلسات أسبوعيه لكن بنضطر نحجز المريض اذا كانت انتكاساته كثيرة
في نهاية كلامي عن الترامادول   أحب أقول أهم من العلاج اننا نحمي نفسنا و أولادنا من انهم يقعوا فيه من الأساس ... لازم يبقي في رقابه من البيت و لازم نقوي الدافع الأخلاقى عند ولادنا من صغرهم و نعرف مين صحابهم و نبعدهم عن العزله و ربنا يحفظنا و يحفظ أهالينا و شبابنا من خطر الإدمان

ارجوا ان الشرح يكون افادكم لو عجبك المنشور ادعمنا بتعليق ومشاركة للمنشور واشترك فى المدونة ليصلك كل جديد